James 3
Tolole o tangada
1Ogu duaahina nei, e dogologo i goodou hagalee hai gi hai digau agoago, idimaa, goodou gu iloo bolo gimaadou digau agoago le e kae di hagi aga damana i digau ala i golo. 2Gidaadou huogodoo e hai di hala i nia madagoaa e logo. Maa tangada hagalee loo e- hala ana helekai, ia e donu, e mee di benebene dono huaidina hagatau. 3Gidaadou e wanga di baalanga gi di ngudu di hoodo bolo gi hagalongo a mee belee hana dono huaidina dogomaalia gi di gowaa dela e dagi ginai gidaadou. 4Goodou manadu ina labelaa di hai o di wagabaalii damana dela e hahaangi go di madangi maaloo. Di wagabaaliii deenei e mee hua di ulungi go hooe hua dulii, gei di maa ga dele gi di gowaa dela e hiihai ginai di gaabinu. 5Deenei la di hai o tolole tangada, tama dudaginga dulii loo, gei e mee di helekai hagaamu ia i nia hagadilinga mee llauehe.Maanadua labelaa tagabae geinga damanaiee e mee di dudu go di mada gologolo dulii loo. 6Tadau holole la di ulaula o di ahi. E honu nia hagadilinga huaidu huogodoo, e haga ihala tadau huaidina hagatau, ga hidi ai tadau mouli, ga wele i di ahi mai di ahi dee odi. 7Tangada e mee di haga gaidala nia manu, gu haga gaidala nia hagadilinga manu huogodoo ala i henuailala: nia manu lodo geinga, nia manu mamaangi, nia manu dolodolo, mono iga. 8Tangada ne haga gaidala dono holole ai. Tolole o tangada le e huaidu huoloo, ge e hagadau dangada, ge e honu i nia mee haga huaidu dangada. 9Gidaadou e hai hegau gi tadau holole e danggee gi tadau Dagi mo tadau Damana, gei e hai hegau labelaa i tadau hagahalaua nia daangada ala ne hai i di ada God. a 10Nnelekai danggee mo hagahalaua, le e loomoi hua i di ngudu e dahi. Ogu duaahina nei, nia mee beenei hagalee belee hai. 11Di monowai e deemee di hali mai nia wai maangala mono wai mmala. 12Ogu duaahina nei, di laagau-‘fig’ e deemee di hua ono hua olib, mo di laagau-‘grape’ e deemee labelaa di hua ono hua-‘fig’, di monowai mmala e deemee di ua aga nia wai maangala.
Di kabemee mai i nua
13Koai e kabemee mo di iloo mee i godou baahi? Tangada deelaa gi haga modongoohia ina dono kabemee mai dono mouli humalia mo ana hegau humalia mo di manawa hila gi lala mo di kabemee. 14Maa tubua, hagadugina mo tumaanga la i godou lodo, malaa, goodou hudee heia di huaidu e hai baahi gi di tonu i godou hagaamu godou kabemee. 15Di kabemee beenei hagalee ne haneia i di langi. Di mee hua ni henuailala, hagalee di mee ni di Hagataalunga, di mee hua ni Satan. 16Di gowaa dela iai tubua mo tumaanga, deenei di gowaa e noho di hinihini mo nia huaidu huogodoo. 17Gei di kabemee mai nua, le e madammaa i mua nia mee huogodoo, e noho i di aumaalia, dumaalia ge hila gi lala, gei e honu i tumaalia, ga hidi ai nia hegau humalia e logowaahee, hagalee dugudugu gee nia daangada, ge hagalee hai hegau ngudu golomada. 18Di humalia deenei la go nia hua o nia hegau humalia o digau ala e hagahumalia mehanga daangada, ala e dogi nadau lii i di aumaalia.
Copyright information for
KPG